Galderak erantzuteko batzuetan erantzuna idatzi egin beharko duzue, bestetan erantzun egokia aukeratu.

Ba al dakizu zer esan nahi duen “Hakuna matata” esapideak? Argi dago ez dugula euskaraz erabiltzen. Swahili izeneko hizkuntzakoa da eta arazorik ez esan nahi du.
Swahilia Afrikan erabiltzen den hizkuntza da eta seguru swahiliz dagoen hitz bat baino gehiago ezagutzen duzula.
Proba egin nahi?
Safari hitza behin baino gehiagotan entzungo zenuen, ezta? Bada, bidaia esan nahi du. Izan ere, honela deitzen zaie Afrikan zehar animaliak ikusteko egiten diren irteerei munduko hizkuntza guztietan.
Eta baietz jakin nola esaten diren zenbait animaliaren izenak swahiliz! Simba hitza entzunez gero, zein animalia datorkizu burura? Lehoia, jakina.
Bada, swahiliak hitz polit pila bat ditu animaliak izendatzeko: elefantea, tembo da; jirafa, twiga da; krokodiloa, mamba da; hipopotamoa, kiboko da; errinozeroa, kifaru…
Baina, Afrikan, ipuinetan ere agertzen dira animaliak. Seguru “Lehoi Erregea” ipuina ezagutzen duzula:
Simba handiak hanka bat apurtuta zuen eta minaren minez orroka zegoen bere kobazuloaren aurrean.
Sungura erbiak, egunero-egunero eramaten zizkion mina kentzeko belarrak.
Egun batean, Fisi hiena inbidiatsua, bisitan joan zitzaion:
- Sunguruk ez zaitu sendatu nahi. Erabiltzen dituen belarrak ez dute ezertarako balio. – esan zion hienak.
Hori entzunda, zalantza sortu zitzaion Simbari, eta galdetu zion:
- Begira zer dion Fisik: ez nauzula sendatu nahi, eta belar horiek ez dutela ezertarako balio. Egia al da hori?
- Egia da, Simba. – erantzun zion erbiak – Baina txikia naiz eta ezin dut lortu zu sendatzeko behar den gauza bakarra: hienaren larrua.
Orduan Simbak hatzaparka galanta eman zion Fisi hienari eta bizkarreko azala kendu zion.
Simbaren hanka laster sendatu zen, baina ez Fisi hienaren bizkarra.
Orduz geroztik, hienek latz-latza dute bizkarreko azala.